حوسینقلی ریاحی فر

يايين سون آييندا بير يارپاق سولدو

باغيم آغي  دئدي، گولوم آغلادي

سؤنمز بير اود ياخدي يازيق قلبيمي

گؤزوم بولاق اولدو، سئليم آغلادي

گؤيده ثريايا چاتدي فريدون

غم ـ غصه ني باشدان آتدي فريدون

قارا تورپاق ايچره ياتدي فريدون

بو آجي خبردن ائليم آغلادي

بير شام آلوولاندي بيتدي دونيادا

كاروان سون منزيله يئتدي دونيادا

بير شاعير رحمته گئتدي دونيادا

يئكنيم آغلادي، ميليم آغلادي

دونياني هئچ كيمه يوخدور وفاسي

حاصارلي سيز قلان يوردوم ياناسي

گئدر گلمز يولدا ايتدي سوناسي

سوناسين ايتيرن گؤلوم آغلادي

اينانمايين بيرده گوله چيچكلر

گوله بيلمز ياسا باتميش اوركلر

قالدي قوشمالاردا ياشيل ديلكلر

سؤز صرافي گئتدي، ديليم آغلادي

آيريليق دير پوزان اينسان تاغيني

قيشدير ويران قويان يازين باغيني

«سيّد»م يازاركن هيجران داغيني

يازيم قيزيل اولدو، اليم آغلادي

میر حوسینقلی ریاحی فر