تزه ایش

تزه ایش

بو ایل بیر آز قیش فصلی تئز گلدی ،چوخ زاماندی کی یئرین، یاز فصلینه ایسته میر وئرسین ،سیمیتنلیقیله هله دایانیب .ایلک مال قاراچیلار- داوارچیلار اینانانمیردیلار قار- یاغمورلار بیر بئلم، چکه جک. دربه لری قورتولاندا بیر ایرمی اوتوز درز- باق ،یونجا -اوت بورج آلماقیلان اینانماق ایسته میردیلر، آمما قار قارین اوستونه یاغیب تاران زامانی، سحر دوروب هر گون بیر ایرمی سانتی قار دالان آلتیندا چاریق- باشماقلار اوستونه گویماقینان، یاواش-یاواش ال آیاقا دوشوب، ایلک قونشولاری، سونرا دوربر کندلری، یاپ بو آخیردا یاپ اوزاق کندلردن- روستالردن مال داوارچیلاریمیزین سسی گلیردی .

حوسین آغانین چایخاناسیندا اوتورموشدوق ،حاجی قدیم آلی قوربانی بیر آه چکیب، بیر داغلارا ساری باخدی، مال داوارچیلارین سوزونون دالیسین توتوب، سوزه گلدی: آی جانیم ،آی فیروز نه کپه یی ،نه کونسانتیره سی، نه آرپاسی کی هامی دالیسیجاندی ،نییه سوزی گیزله دک؟ ایندی هامی بئی اولوب ،بوردا اوتورانلارین هامیسی بلکه چوخلاری او ایشی حتمی گوروب،دولندیلر ایکی- اوچ اوزون قولاغی واریدی، اولمویاندا بیر- ایکی سین بورج ائیله ییب، دان اولدوزوندا بو داغلارا گئدیب، بو آرخاشدان او آرخاجا آشیب ،زیغوودان -پاپادان -گجیلدن -قییامدیندن گئچیب، آخشاماجان ایکی سفر قه ییدمه سه یدیک ،ائوه قویمازدیلار.دامدا بیر تایا بیر تایا چکردیق، آللاه ایرحمت ائیله سین چوپور اسمرین نظری دئیمه سین، بیر بویوک توپجاق اوزه لیک باغلاییب گوز توتان یئره آسلاردیق.

 بو سوز بیز ایکی جاوانا برک ده یدی، تئز ائشیکه دوروب چیخدیق، قول- قرارلاشدیق بیر- ایکی ائششک تاپاق، قیش چیخماق همین، داغلارا گئدک.

 هاردان بیر -ایکی ائششک تاپاق چوخ فیکیرله شندن سونرا بیر نفر یادیمیزا دوشدی، نووروز عمی گیله گئدیب قاپینی دویدوق، نووروز عمی نی چکیب ائشیگه گتیرندن سونرا ،ایشیمیز حاقدا اوندان ائششگین ایسته دیق. بیر آه چکدی، ائله بیل دده -باباسین یادینا سالدیق! تانیمییان بئله خییال ائدردی کی هانسی مجنوندان لیلی سین آلیبلار. او دئدی: بالا یادیزا گلمیر منیم او دیویست و بیست قره بئنزیمین اوستونده، قونشولاردان حتتا سیزدن نقدر میننت ائشیتدیم ،آخیردا او قره ملییی، قصصاب داداشا ساتدیم، بولمورم اوندا قالیر یا یوخ .

کور پئشمان قاییدیب گلنده ،یولدا محممدعلی عمی یه راست گلدیک. دردیمیزی اونا آچاندا ،او بیزی چوخ ایشیمیزده تعریف ائدیب، دئدی: ائله بو ایشلردی کی اولکه میزی دولتدی ائیله یر، جاوانلار اؤزلرینه ایش جورله ییب ،یئنی ایش یارادیرلار. آمما بیر سوز وار، سوروشدوق نه سوز؟ دئدی: داغدا داغ اولاغی ایشه گلر! بیزیم ائششکلر، دوز یئرلرین اوزون قولاغی دیر! سیز گرک داغدا اولان کندلردن گئدیب تاپاسیز.

صاباحی داغین اته یینده اولان قونشو کندین یولوندایدیق، یئتیشندن سونرا بخشعلی آدیندا بیر نفرین قاپوسون ،سئوینه- سئوینه  چالدیق. آخیر-باشدا چایلاشیب، یاغ -یومورتانی یئیب ،سونرا قرار قویولدی اوزون قولاقین اؤز رایی اولسا، مسئله سی یوخدی، بو ایشه معامله اولونسون.

 قاپی دویولدی ،چوخ احتیرام -عززتیله طویله یه داخیل اولدوق. طویله نین باش یئرینده ،بیر گوزل رنگیده خر دورموشدی. اؤز رویامیزدا بو هیکلدن گوزل بیر شئی تجسسوم ائیلییه بیلمیردک، بو هیکل یدی کی ایه ر هه نین یئتیرسردی، بیزیم چورگیمیز ساری یاغا باتاجاقیدی. سوزو گاماس- گاماس بیر تهر باشلادیق، بیز دانیشاندا تکجه موبارک قویروقون هردن ساغا -سولا تاپیلدادیردی، سوز بو کلمه یه گلیب چاتاندا: یازدا بیزیم بیر آز یاردیمیمیز اولاسیز، بیر دونوب خکوره بوینویله بیزه ساری باخیب، باشین بیر یوخاری آپاردی، اتدی دوداقلاریله - صدفلی دیشلرین کورسه دیب، بیزه بیر گولومسیلندی، دئدی یوخ!سیزین ایشیز دئییل ،اینکلر -آتلار بیر آز بو سوزدن قیراغا جکیلیب، بیر- بیرینین اوزلرینه باخیردیلار. بیز ایکیمیز بیر -ایکی قدم یاخینلاشیب، نه باشیزی آغریدیم بیزدن چوخ یالمارماق ،اوندان آز ائشیدمک، آخیردا من دیله گلدیم: نییه آخی قبول ائیله میرسیز؟ نه ایرادیمیز وار؟ سوپالیقدان ال چکمه دن خر جنابلاری، آخیر سوزلری بئله دئدی: آهان ایندی منیم سوزومه گلدیز، آجیقیز گلمه ز دئسم؟ دئدیم: یوخ بویورگونان. دئدی: ایندی کی آجیقیز گلمه ز، زحمت اولماسا بیر باشیزی آغیرا طرف اوزادین! باشیمی  اوزادا -اوزادا خر جنابلاری سوروشدی: آغیردا نه گورورسن؟ دئدیم: هئچ، بیر آز قووون- قارپیز، اونلاردا قوری اریکدی، اونلاردا ائله بیل امروددی. اوزون قولاق منه بیر بویور دئدی، بیر امرود گوتوردوم یئدیم چوخ مزه لیدی، بیر- ایکی اریکده یئمیشدیم دنه سین سیندیریردیم ،اوزون قولاق، دئدی: داداش! بو اریک سیزده کیلویی نئچه دی؟ دئدیم :نوبرانه دی نئچه یوخاری اولسا آلاجاقلار. دئدی: امرود نئچه ؟دئدیم: اودا اریک کیمین. دئدی: گوزل قووون سیزده تاپیلماز، تاپیلسا کیلویی نئچه؟ دئدیم واللاه آلماموشوق، فییاتین بیلمیرم. دئدی: گوردوز سیز اؤزوزه تاپانمیرسیز یئمه گه ،منه بونلاری هاردان آلیب گتیره جکسیز؟ اوردا آوارا قالدیم ،یولداشیمدا بیر سوز دئمه دی. گوردوم، ایه ر بیر زامان یاپ گلدی، هر گون قبول ائیله دی بیزه ایکی سئرویس خط آچدی، ایکی خططین پولی بو قارداشیمیزین شامنان سونرا دئسرین گورمز، هله شام- ناهاری -شب چره سی ده بونون اوستونده کانارا قالسین کی شامنان سونرا ایسته لینیر آغییا وئریلسین .

چوخ خوشوما گلدی دوستومون باشینا باخا- باخا او دئدی: داداشلاریم بونودا دئییم ،زحمتی آزالدین، باشیزین اییسین وئرمه یین! سیزی یاخین یولدان قارتاریم، منیم او عممه می- عمی می- داییلاریم -خالام ارینی ساخلامانیزدان بللیدی ،هانسی اوزونن بو طویله نین قاپیسین آشمیسیز. بیر باخین آخیرسوزومدی: بو طویله نین موشکورتون سیز کندیزده آتلاریزا وئرمیسیز، بیز بوردا آرپا میل ادیریک سیز آتلاری اوردا سامانه حسرت قویموسوز.

خیلاصه آخیر سوز هر یئردن بیزی باغلادی،باشین دوندردی او طرفه، دئدی: گئدنده قاپینی یاواش اورترسیز! بیر- بیریمیزین اوزونه باخیب طویله دن ائشیکه چیخدیق، بخشعلی عمی نین اوزونه باخاندا ،اودا  چیین لرین آتیب -توتدی سوزی اؤزوندن سالدی.

بیر آزدان سونرا کندیدن آرالانمیشدیق، بیر آنقیرما سسی اوجادان  گلدی ، بولمه دیم نه پیامیدی !بخشعلی عمی ده یانیمیزدا دئییردی او ترجه میز اولسون. آمما ایکی حالدان آیری دگیلیدی، یا اینک لرین- آتلارین اوستونه هیسله نیردی، یادا بیزه اوجادان یامان- یوووز آتیردی.

یولوموزدایدیق، بیردن یولداشیم بیر اوجا سس له اوزون قولاقا جاواب وئردی! آخیردا او گولدی من گولدوم ،منده ایسده دیم یولداشیما جاواب وئرم، بیر اویانا باخدیم بیر بویانا بیر برکدن سسلندیم! اوندا گوردوم هم آرواد همده اوغلان باشیم اوستونده ،یاواش- یاواش اویادیرلار. اوغول، دئدی: آتا- آتا بو نه ایشدی؟ گه ل بو لیوان سویی ایچ، بیر بسم الله الرحمان الرحیم ده ییله ،بیزی ده قورخودورسان، آتا سنه گوزل ایش دئییل ،قونشولار ائشیدیب پیس اولار. یوخودان دوردوم،باش سوزی کی دئدیم، بو سوزودی: گوره سن ائششکده دانیشار؟! اوغلوم اوتاندی آناسینین اوزونه باخدی، آمما آرواد بیر تهر، دئدی: کیشی یه باخ دلی اولموسان؟ تله سیک ،دئدیم: هئچ بیر زاد اولماییب ،قورخمایین .اؤزومی تئز یوخویا ووردوم، بلکه بخشعلی آغانین اوزون قولاغین گوردوم! بعضی پارا مسئله لری اؤزوموزدن- کانار گوشه دن  خبر آلیم ،خبردار اولوم !آمما هئچ بیر قره لتی گورولمه دی !آخیر- آخیرلاردا بیر خر باشین گوردوم کی دیشلرین چیخاردیب! منه برک -برکیدن گولوردی!!

گرگرلی آراز